陳綺貞一連3場嘅20周年演唱會「漫漫長夜」噚晚喺台北小巨蛋舉行尾場演出，五月天怪獸、梁靜茹、范瑋琪都有去捧場。

闊別小巨蛋5年嘅陳綺貞，以黑白視覺作主題，演唱會其中一個高潮，係陳綺貞同擔任今次音樂總監嘅結他手男友鍾成虎，一齊坐升降台到小巨蛋3樓高空，合體演唱新歌《跳舞吧》，之後兩人仲合奏《快速動眼》，陳綺貞更感性告白：「謝謝總是用他的才華無私付出。」

當陳綺貞演唱經典歌《還是會寂寞》時，佢話：「認識大家20年，卻從來沒有一起唱過歌，今晚我們就把小巨蛋變成KTV吧！」全場歌迷配合同佢一齊大合唱，令小巨蛋頓成卡拉OK大包廂。喺encore環節，陳綺貞再次演唱新歌《台北某個地方》，台上螢幕顯示20年來珍貴畫面，佢仲因感動而哽咽話：「20年來有你們這群華生（陳綺貞歌迷的稱呼）是我最幸福的事，接下來我會繼續寫歌，把你們的故事寫進我的歌裏。」

之後陳綺貞出席慶功宴，提到佢喺演唱會以低胸禮服上陣，尺度大開，佢笑言自己只係着上造型師畀佢啲衫，完全冇心理負擔，佢又話舊年嚟過香港上表演堂後「開竅」，更勇於展現肢體，反而係升上3層樓高演唱，令佢膽顫心驚，佢仲話：「感覺有在晃，往地下一看會暈。」

陳綺貞話，早排因為忙於籌備演出，搞到朋友都唔敢搵佢或約佢，佢自嘲：「朋友都不敢找我，自動退散，跨年聖誕沒人理我，超邊緣有點落寞。」提到佢同男友鍾成虎合體演出，掀起高潮，問佢會唔會喺巡唱後結婚，陳綺貞話未有計劃。而佢噚晚臨時加多一首歌嚟encore，因超時被罰52,500元新台幣（約13,338港元）。

精選娛聞，喺晒《娛果》
http://fb.com/appledailyent