袁文傑、滕麗名、呂慧儀、劉丹、蘇韻姿等，今天喺電視城出席處境劇集《愛·回家之開心速遞》宣傳，袁文傑自爆兩星期前同阿滕拍攝一場戲時，唔小心差錯腳，將抱住嘅阿滕成個人拋落地，阿滕背脊落地再撞到頭，袁文傑就撞傷右膝蓋，仲發現有碎骨。

阿滕話當晚有朋友咁啱住喺拍攝現場樓上，即時致電慰問，佢話﹕「我冇諗住講出嚟，但有朋友打畀我問我係咪跌親，話聽到『嘭』一聲。」袁文傑話﹕「我好內疚呀，好內疚，將個女主角拋落地，我又痛到擘大個口出唔到聲，佢又唔郁，個心離幾離！如果癒合唔理想，都會考慮做微創取碎骨。」

另外，曾經同一班港姐去台灣拍外景嘅袁文傑，亦撐雷莊𠒇得冠軍。對於網民劣評如潮，﹕「喺台灣拍嘢時，已覺得佢學習能力好快，短時間內改進短處。其實都要視乎好多方面同賣力程度，問答環節最重要畀人覺得夠真。」而呂慧儀喺現場講起囝囝蟹籽同佢慶祝生日，即甜在心，佢話﹕「佢話媽咪今年3歲生日，真係好搞笑。」