李八方online︱公民黨、民主黨議會外回應時政 拒讓建制派一言堂
蘋果日報 2020/12/04 17:57
李八方online公民黨民主黨
自從19名民主派立法會議員離開議事廳後，建制派雖然聲言要肩負起監察政府嘅責任，只不過成效係點，相信大家有目共睹。就算議事廳變咗建制派同政府扯貓尾嘅舞台，民主派方面都要有對策。今朝公民黨就決定以後逢周三、五晏晝喺立法會外回應時政，八方亦聽聞，民主黨準備參考類似做法，向建制派反擊。
公民黨秘書梁嘉善同八方講，嚟緊公民黨會就着唔同嘅時事議題，安排相應嘅政策發言人，或者關心該議題嘅區議員出嚟回應。資料圖片
今朝公民黨透過傳媒短信群組宣佈，佢哋以後會逢周三、五喺立法會外見記者，回應議會內外時政，以免畀建制派喺立法會內一言堂。身兼大律師嘅公民黨秘書梁嘉善同八方講，嚟緊公民黨會就住唔同嘅時事議題，安排相應嘅政策發言人，或者關心該議題嘅區議員出嚟回應。
唔止公民黨，據知民主黨亦打算有類似嘅做法。民主黨副主席羅健熙同八方講，希望借此繼續維持民主派人士嘅聲音，同時畀更多民主黨人有機會就住各人所關心嘅議題去回應，唔使再局限喺以往主要係立法會議員回應時政嘅局面，雖然時間、地點就未傾好，要留待中委會討論細節，不過點都好啦，總好過日前有線宣佈大裁員咁大件事，事後立法會咪兜都可以冇人講嘅狀況。
民主黨副主席羅健熙同八方講，民主黨亦打算有類似嘅做法。資料圖片
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！