同吳若希(Jinny)傳緋聞會惹上咀咒？先後跟吳若希傳緋聞嘅大孖周志文，同大隻仔溫家偉都先後離開大台，今日吳若希出席狄易達假鑽石山舉行演唱會發佈會時，被問及大孖離開大台仲有冇聯絡，佢話:「我返香港之前有問候佢，返嚟忙工作就冇搵，希望佢前程錦繡。

問會否叫佢媾少啲女？，吳若希話:「佢自己知有乜應該做，有乜唔應該做，好似話佢都有啲工作。」佢嚟緊同四個o靚模合作？Jinny就話:「咁加油、咁加油。」講到同佢傳緋聞嘅男藝人都無好下場，佢笑言:「咁就大鑊啦。」問到是否公司唔畀佢拍拖，每逢傳緋聞男藝人都要走，佢話:「無理由，許廷鏗、鄭俊弘同胡鴻鈞都有傳過。」得出結論仍似係同唱片公司嘅藝人有免死金牌。

上次狄易達開騷時臨時拉佢上台，仲要瞓上台上張床，吳若希話:「我公開床戲第一次畀咗佢，我一定要佢諗番樣第一次還畀我。」狄易達聞言後笑指有拖無欠，慢慢諗下先。

今次達仔演唱會將於12月13日假StarHall舉行，主題係「擁抱」，佢覺得人與人之間一個擁抱勝千言萬語，更自爆平日得罪女友都是一個擁抱解決，演唱會上女友會嚟欣賞，更特意唱國語歌送俾女友及台灣朋友，問到會否於台上向女友求婚？佢話:「太遙遠嘅事。」而嘉賓就搵咗周國賢。