對剛於12月8日43歲生日嘅綽號「炒飯哥」澳洲騎師羅理雅嚟講，今屆香港國際賽有多重意義，更係策騎生涯最重要一日。

羅理雅喺香港短途錦標隻「紅衣醒神」有幾勁，毋須再多講，炒飯哥笑笑口話人生真微妙，事關去年佢因為喺谷草不小心策騎，導致蔡明紹喺過終點時墮馬，自己被罰停賽緣盡國際賽日，上屆只能夠睇電視直播，見到原本由自己策騎嘅「天才」改配潘頓，只輸畀「滿樂時」獲亞軍，炒飯哥話嗰刻內心都幾心酸。

事隔一年，羅理雅周日(10日)國際賽有得出賽之餘，座騎「紅衣醒神」仲成為主隊爭標希望，炒飯哥貴為3屆悉尼冠軍騎師，喺澳洲贏過不少大賽，但喺香港仍未贏過G1，佢直言呢場係佢嚟香港長期發展後，最重要一仗，如贏出肯定係廿幾年策騎事業一大榮耀。

羅理雅又話12月8日牛一同屋企人食飯外，冇特別活動慶祝，專注應付好今屆國際賽。