陳豪、胡杏兒、陳法拉等噚日喺將軍澳出席無綫劇集《秋香怒點唐伯虎》宣傳活動，由於劇名諧音係「秋香露點唐伯虎」，所以杏兒開玩笑話唔會露點，希望大家唔好誤會。杏兒喺劇入面擁有一身好武功，佢話未開拍時已開始練功夫同埋拉筋，好彩拍攝期間冇受傷。向來行性感路線嘅法拉喺劇中就不敵杏兒，雖然電視尺度有限，但杏兒話自己會有出浴露肩兼着肚兜嘅戲份。

法拉摑唔停

由於劇中陳豪不時俾兩個靚女打，所以噚日活動上，兩個女主角手執籐條同扭陳豪耳仔，大發雌威，法拉話劇中要不停摑人，其中一場戲要摑陳豪，仲NG咗幾十次。法拉直言今次自己唔多性感，反而杏兒就有性感演出，原因係陳豪經常喺劇入面發淫賤夢，陳豪笑住話：「唔係淫賤夢，只係瘋狂！」陳豪仲封兩位女主角喺劇中嘅行為係屬於古代港女。
雖然杏兒今次演出較法拉性感，但佢會唔會學法拉早前喺劇集度除剩胸圍，佢就話：「睇收視點啦，一係就等續集都OK，不過都要睇劇情需唔需要先，如果個bra唔太薄都可以接受到。」劇中陳豪同杏兒仲有場咀戲，問杏兒怕唔怕男友黃宗澤介意，佢話：「都唔關佢事！」