胡杏兒同呂慧儀今日喺尖沙嘴出席奶粉活動，杏兒喺席間獲小男孩獻吻，搞到佢好開心。杏兒指囝囝李奕霆（Brendan）快6個月大，體重近20磅，佢笑言現時嘅臂力好好，仲認為母乳夠營養，佢仲甜笑咁話：「生多幾個都冇所謂，我會努力。」

講到杏兒嘅婚紗公司將於下月喺上海開分店，佢話：「好忙呀，4月都要拍戲，其實呢個月飛咗3次，我泵奶之後要雪住，然後再拎返香港，我o依家係母乳達人，但我都好佩服在職媽媽，幾辛苦都好，一見BB就開心晒。」問到杏兒咁忙點「造人」？佢笑住話：「Keep住做，把握機會，夾吓日子，最緊要係養好身體，仔女都無所謂，不過我見到啲女仔着衫咁靚，我好羨慕。」

講到佢髮線向後（新聞連結： http://bit.ly/2pn3UXc ），杏兒解釋不嬲都係咁，係爸爸遺傳，叫大家唔好擔心，仲指佢老公李乘德（Philip）都冇乜留意自己髮線位置，原意係想讚佢嘅廚藝。談及姐夫鄭泳舜當選立法會議員，杏兒表示：「大家都好忙，未有慶祝，但我有恭喜佢。」

另外，「長腳蟹」呂慧儀指囝囝黃柏翹（蟹籽）已3歲半，認為係時候可以追番個，可惜蟹籽唔批准，呂慧儀話：「要搞掂蟹籽嘅諗法，佢話可以分享玩具，但唔可以分享媽媽，瞓覺嘅時候一定要我講故事，都開心嘅，培養到佢閱讀嘅興趣。」

精選娛聞，喺晒《娛果》
http://fb.com/appledailyent