今屆嘅區議會選舉真係越嚟越有睇頭，皆因繼撐警大聯盟兼正義聯盟召集人李偲嫣，前日話考慮參選區議會或立法會之後，受到高登仔熱捧嘅另一位「女神」、一直好關心社會大小事、不平則鳴嘅黃夏蕙，噚日亦喺個人facebook貼咗張單人靚相，註明：「Lee（呢）張相，將會係我決定參選的海報頭像，我希望喺2015年再向人生理想努力！」

「切勿支持私煙」

2015年係區選年，唔通夏蕙BB想硬撼偲嫣BB？若然係咁，夏蕙BB都有唔少粉絲，好多網民留言力撐：「我要夏蕙E（姨），狙擊李私煙！」估唔到夏蕙BB真係有睇留言，仲幽默回覆：「我不贊成大家吸煙，所以切勿支持私煙，多謝大家！」
咁多人支持喎，係咪為夏蕙BB打咗支強心針？八方問過佢嘅經理人Simon，佢話夏蕙BB係積極考慮參選中，但暫時未有決定，一切只在籌備階段喎。
八方噚日都打電話問偲嫣BB，想知佢點睇夏蕙BB受佢啟發要參選，但偲嫣BB只回應：「我唔接受你哋《蘋果日報》訪問，唔好意思。」之後就收咗線，讀者無緣知道佢會唔會視夏蕙BB為假想敵咯！