周嘉儀今年初被爆與經民聯立法會議員、全國政協林健鋒的34歲公子林凱章（Victor）相戀，女神拍拖了，想必令不少粉絲夢想幻滅，但卻正正相反，嘉儀獲網友大力支持。日前嘉儀接受訪問，剖白她的感情世界，嘉儀笑說：「多謝大家關心，都係唔想講咁多，低調！我從來處理感情都係比較低調啲，想keep番自己嘅私隱同空間，每一次都係。」問到男友Victor是有家庭背景的人，會否有壓力？嘉儀說：「拍拖最緊要兩個人開心，𠵱家都相處得好好，𠵱家開心，都係甜蜜期。」

少提戀情怕被鬧

嘉儀直認二人的戀情近月才正式萌芽，大家是朋友介紹認識，問到嘉儀的男友是否一個浪漫的人？她甜絲絲說：「佢對我好好，好關心我，希望大家相處得開心，呢個甜蜜期可以繼續落去。」提到結婚對象，她說：「其實我又冇諗到太長遠，每日都希望大家過得開心，互相畀到支持大家，係一段關係上面最緊要嘅，希望幫到對方一路成長，好多正能量互相支持。佢工作上都會有經驗同我分享，畀到意見，佢幾好嘅……大家工作各有各忙，但都會爭取時間見面嘅，大家協調，唔講佢咁多嘢嘞，俾佢鬧。」

其實嘉儀自離開大台後，總喜歡以社交網站跟fans交流互動，她說：「其實一直都有幫公司每星期製作短片放上網，係一個同出面接觸嘅channel，都當係一個幕前工作。我之前公司就嚴啲，唔可以玩。我喺舊年4月開始有facebook，希望可以同外界接觸，希望可以答謝番支持我嘅朋友，一開始用香港早晨模式報天氣，好得意，我覺得呢個page互動性幾強，有啲仲變咗朋友，尤其係唔舒服時關心嘅留言，係好warm嘅page，希望透過網頁發放正能量。」嘉儀表示網頁剛過6萬人like，問她有否收過騷擾訊息？她笑說：「示愛都會有，騷擾就唔多，多數鼓勵同正面多，其中幾個已經認得。」
採訪：羅慧敏