眼見乒乓球名將福原愛婚訊曝光，作為前男友嘅日本網球手錦織圭都唔想落人下風，喺周三美網男單八強以盤數3:2險勝二號種籽、英國嘅梅禮，入四強後會硬撼華域加。（樂視今日7:00am直播）
錦織圭今場贏得相當驚險，喺第一盤先輸局數1:6。第二盤打到局數3:3嗰陣，比賽因為落雨而暫停，要等天幕閂好先可以重新開始；結果錦織圭回勇以局數6:4追番一盤。

臭馬梅禮又自爆

雖然梅禮贏第三盤而再次領先，但喺第四盤就出現咗爭議性場面，令佢情緒一發不可收拾。當梅禮領先嘅時候，場館入面突然出現奇怪噪音，球證決定要重打呢一分，29歲嘅梅禮向球證發脾氣之後，仲不斷失誤；錦織圭趁機以局數6:1勝出，追平盤數2:2。錦織圭去到決勝局把握對手不斷犯錯，再贏局數7:5，苦戰四個鐘後終於以盤數3:2晉級四強，將會硬撼三號種籽、瑞士球手華域加。錦織圭喺賽後都承認，第二盤等賽場閂天幕嗰陣對自己有利，因為可以同教練張德培交流，及時調整戰術。26歲嘅佢同日仲贏到今屆美網體育精神獎，佢話：「我今日喺比賽一直保持冷靜，雖然有時不在狀態，但仍然會堅持打落去，我諗大家都睇到我頑強嘅鬥志。」
雖然錦織圭唔似前女友福原愛咁幸福，但係佢可以自2014年美網後，再次打入大滿貫四強，都係一件值得開心嘅事！