中國人有句說話「螳螂捕蟬、黃雀在後」，喺商界亦用得着。國際名牌喺香港大肆擴充，又出天價搶舖，好似皇后大道中卡佛大廈嘅瑞典時裝店H&M旗艦巨舖咁，已經俾自西班牙行家ZARA以高出1.2倍嘅價錢搶租成功，月租1,100萬銀。
究竟點解ZARA會出過千萬一個月去租個舖咁勇呢？原來家ZARA喺中環國金二期商場嘅旗艦店（圖），到年尾就會期滿，由於業主會有特別搞作，想將呢個1.5萬呎舖間成三個舖出租，所以ZARA就算想續租都冇得留低。
ZARA搶租都唔係第一次，04年佢哋首次打入香港市場，就睇中咗國金個舖，當時「螳螂」H&M諗住坐定笠六續租，點知俾「黃雀」ZARA嗒咗做埋中環旗艦舖，今次H&M又係太過腦定，巨舖再次被搶租。