西環街坊最近行過中聯辦後門大馬路時，都會見到有兩條紅底黃字、用簡體字寫嘅橫額，正當大家以為又係啲乜乜同鄉會、聯誼會作品之時，先發現原來別有洞天，分別用簡體字寫上「廢止一黨專政」同「實行民主政治」，再睇真啲，原來係民主派立法會議員區諾軒同西環飛躍動力召集人葉錦龍嘅傑作。
八方問過葉錦龍，佢話同區軒合作主持網台節目多年，鑑於早前有建制派同中方官員聲稱要求「結束一黨專政」人士不能參選，佢同區諾軒作為「愛國愛港香港人」嘞喎，希望提醒番喺中聯辦返工人士，中共前領導人毛澤東都提倡過「廢止一黨專政」同「實行民主政治」，認為咁樣先可以令國家富強，希望佢哋唔好忘記。