富豪嘅生活一直係大家夢寐以求，查實富豪嘅口味同大眾係咪好唔同嘅呢？胡潤百富噚日喺上海公佈一個調查，睇吓08年中國千萬富豪嘅品牌傾向，胡潤話，調查結果發現，內地富豪嘅生活方式越嚟越成熟，即係唔再暴發戶式，而係有品味，識享受嗰隻，甚至開始有啲似香港嘅大孖沙，唔再一味諗計搵錢，而係追求健康生活。
點樣做先最健康？幾代國家領導人已經親身示範過，咪就係游水囉。根據胡潤百富嘅調查，舊年最多內地富豪揀嘅休閒活動係游水，而唔再係往年嘅出國旅行。至於最多香港富豪鍾意玩嘅golf，對內地富豪嚟講只係排第三。
雖然話游水無分貴賤，但對於一班身家隨時過千萬人仔嘅內地富豪嚟講，唔知佢哋游水時使唔使好似幾位領導人咁，一大堆保鑣傍住呢？

選寶馬7系防綁架

其實，要識享受又有幾難，只要有錢啫，吓嘩。胡潤百富調查嘅富豪，660人資產千萬人仔以上，當中過億人仔嘅有105個好漢，調查喺上年5至11月期間做嘅。咁呢班近年先冒起嘅內地富豪，品味又點呢？
最多內地富豪會揀工行（1398）幫手理財，而投資就集中喺股票（33%）同房地產（26%），皆因68%受訪富豪話對中國未來兩年經濟好有信心，所以49%富豪表示會積極投資。
錢搵得到亦要識使，內地富豪出門公幹或旅行時，最鍾意坐嘅航空公司係中國國航（753），去遠啲如亞洲或歐洲，佢哋就分別鍾意坐港龍航空同法國航空。呢班新晉富豪似乎對法國情有獨鍾，若然出國旅遊，法國係最多內地富豪想去嘅；亞太區就揀澳洲；中東嘅話就梗係最豪嘅杜拜啦；喺國內玩，反而想去有古樸風味嘅雲南。
錢多咗最怕係乜吖？綁架囉，所以最得內地富豪青睞嘅豪華房車係寶馬7系，皆因寶馬7系出名可加強防彈功能，據講超人個知己周凱旋，同新地（016）郭炳湘都用過。

超人愛golf　賭王好網球

內地富豪鍾意游水，咁香港富豪又鍾意玩乜呢？華華第一時間諗到嘅就係golf，股神李兆基、超人李嘉誠，彤叔鄭裕彤同中信泰富（267）榮智健等人都好大癮，李四叔同彤叔老友鬼鬼，成日約埋一齊打。
Golf點解咁受歡迎？方便傾生意嘛，由一個洞行去另一個洞，咁多時間密斟，乜「刁」都傾成啦！
至於賭王何鴻燊就鍾意打網球，華華成日見佢參加慈善網球賽，唔好睇賭王年紀大，佢打波勁道十足，冇乜喘氣。新地（016）郭炳江就最叻跑步，間唔中都會參加慈善馬拉松，連身邊嘅保鑣都未必夠佢跑，犀利啩！年過百歲嘅邵逸夫就冇咁激，朝早會先練兩粒鐘氣功，跟住耍太極、散步同游水，唔係點會咁老當益壯。
至於富豪第二代玩嘅就刺激啲，李察李澤楷熱愛潛水。
而合和（054）胡應湘嘅公子胡文新，同小賭王何猷龍都熱衷冰上曲棍球，胡文新仲創辦香港冰球訓練學校。

電郵：mailto:[email protected]