今屆區選新人王，怎少得大律師林作？撇開十優港姐女友不談，接受傳媒訪問時的「率性」，帶來不少娛樂性。林作接受《蘋果》訪問時大平反：「其實我係特登咁樣揀！」他說政治太沉悶，刻意走輕鬆路線：「輕佻少少、娛樂性少少唔緊要㗎，最緊要係你個理念、有冇一個message出到嚟」，相信成功吸引部份年輕人，關心他所倡議的中間路線式政治。

記者：許偉賢

選舉期間出現娛樂版甚於港聞版，林作直認有選民或持負面看法，「都唔知你嚟呢度（黃大仙龍星選區）做乜？」但認為此番「名氣」並非以三百多票敗於現任議員、人民力量譚香文主因，「最根本問題係時間唔夠」，坦承欠缺足夠時間「瞓身」落區，「有啲其實唔鍾意我對手嘅選民，因為唔夠清楚我sell嘅嘢，而決定投畀對方。」

有以上分析，皆因有「前輩」對他說：「佢話識一啲朋友喺我嗰區，係含淚投票對方（譚），因為至少對方賣啲乜嘢，佢知道囉、有個保險囉，呢樣我理解嘅。」

以賣理念而非地區事務為選舉策略，他直認值得檢討，「咁我未出嚟選過、又無地區政績，要最快達到畀選民知道你賣啲乜，最快就係賣意念……如果（理念）啲嘢可以落地啲、係會好啲，但歸咎究底都係時間唔夠。」

麥明詩曾說男友「不夠成熟」；年僅25歲的林作坦承，個人的選舉表現「進步空間好大」，強調沒預期如此受關注，面對的壓力不少，「好多『位』係準備不足。」例如他接受《壹錘定音》訪問談選舉抹黑，予人輕浮之感，林作稱：「其實私底下我係比較嚴肅，果次嘅訪問style係我自己揀；啱唔啱係一件事，我當時覺得用咁嘅態度，可以抵銷一啲我嘅攻擊……我會想像佢（主持人）覺得我係嚴肅，但我就特登唔想咁。」

結果訪問最令人深刻的一幕，莫過於他回應是否知悉師傅清洪代表譚香文時前言不對後語，卻配上生鬼動作主動叫「回帶」──「當時我嘅助選團喺咁喺隔離做dame手勢；（當時）精神狀態唔係好掂，要應付關於競選嘅新聞。」

「有啲人話我輕佻、輕浮、係好細個天真嘅表現；其實我係好樂意承認：我係專登咁揀！因為我相信宜家香港政治太沉悶，如果你喺一個訪問、寫篇嘢，成個feel好似政府高官咁講嘢，我自己作為咁樣年紀嘅年輕人，我都唔想聽。」

林作深信今次「輕佻少少、娛樂性少少」的論政風格已達標，「如果你冇（傳達理念），成件事係搞gag嘅，咁樣真係唔好；如果裡面有，結果令到更多人關注、去諗你嘅嘢，咁就係成功咗……有啲人同我講，今次因為你而follow咗區選好多，我覺得係一件好事。」

反而他對被指是隱形建制派不以為意：「我被標籤為隱形建制係好正常，因為對手係激進泛民，佢係咁樣嘅定位，一定將我擺喺另一邊」，更笑指：「如果從選舉策略上要贏，我利用啲人標籤你做隱形建制派，可能票數更多」。但他強調若然再揀，也會以獨立招牌參選，「因為我係打緊一條第三路線：我真係希望中間溫和派，係可以成為一股勢力；今次喺表達理念上係逗號，頓號，確實未完成。」