第90屆奧斯卡金像獎頒獎禮聽日隆重舉行，當中以墨西哥導演吉拿域戴拖路（Guillermo del Toro）嘅作品《忘形水》（The Shape of Water）最具話題，分別獲最佳電影、導演、女主角等共13項提名！話晒樹大招風，隨着《忘形水》名氣越大，是非亦越多，更捲入抄襲醜聞，不過亦有陰謀論指近期才爆出嘅指控係想阻止《忘形水》得獎，令電影蒙上陰影。

英國女星莎莉荷堅絲（Sally Hawkins）喺《忘形水》中飾演啞女清潔工綺麗莎，愛上被囚禁在研究所水箱內嘅人魚生物，決心拯救對方。電影熱爆今屆奧斯卡獲得13項提名，不過賽果揭盅前卻連番被指控抄襲；曾獲普立茲戲劇獎嘅Paul Zindel之子David Zindel提告，指《忘形水》抄襲其父於1969年嘅作品《Let Me Hear You Whisper》。《Let》作講述女清潔工人於研究實驗室與一條被困住嘅海豚有特別聯繫，並嘗試拯救，兩個故事相似。

David在入稟文件中指出兩部作品有「超過60處相同」，包括兩者都以任職實驗室嘅孤獨清潔女工為主角、女主角為阻止實驗室內嘅海洋生物遭人解剖，冒險相救等情節。電影公司對此強烈否認，批評有關指控「毫無事實根據」，又指兩者最大分別在於《Let》作主角拯救嘅係一條海豚，《忘形水》出現嘅係水怪。David表示對於一間大公司擅用亡父作品拍成電影感到震驚，《忘形水》發行商方面則指兼任導演及編劇嘅吉拿域戴拖路從未看過《Let Me Hear You Whisper》，並指導演從影以來都很開放談論自己受甚麼作品啟發，如Zindel家族有任何問題，歡迎找他們傾談。

指控《忘形水》抄襲嘅唔止一宗個案，仲有拍過《天使愛美麗》（Amélie）嘅法國鬼才導演尚皮亞真諾（Jean-Pierre Jeunet），連佢都聲稱《忘形水》女主角與好友跳舞嘅戲份係抄襲其作品《妙不可言》（Delicatessen）內一場男女主角在房內跳舞場面。尚皮亞真諾表示曾向《忘形水》導演吉拿域投訴，但吉拿域稱沒有抄襲，只係受到導演泰利基廉（Terry Gilliam）嘅影響。尚皮亞表示對吉拿域失望多過憤怒，因為覺得對方有足夠才華，唔需要抄人。

其實吉拿域早前接受《蘋果》專訪，佢曾解釋《忘形水》故事概念由來，佢表示：「當初朋友告訴我一個故事，講一個清潔女工發現一個獨特生物，結果幫牠逃脫並住在自己家，我一聽就覺得是個美麗的故事。」並指自己從兒時看一齣舊片獲得靈感：「我小時候看過一部電影叫《Creature from the Black Lagoon》，是悲劇收場的，但水的故事在我腦中已存在多年。我從事電影工作有25年了，我一直都喜愛古怪的童話、不一樣的故事。」說明靈感源自朋友與自己的回憶，絕非抄襲。