陳曉東同李蕙敏今日喺荃灣出席童夢慈善基金會活動，呢個會係幫助香港低收入家庭嘅學生，李蕙敏表示中學畢業後，曾經諗過修讀設計，但因當時參加唱歌比賽，又恰巧有公司簽佢，於是就入咗行，不過佢話為咗對演技有幫助，所以佢0依家想報讀心理學。陳曉東認為幫到其他人係一種福氣，所以佢希望大家能夠支持香港學生，因為教育係基本。

噚日係陳曉東42歲生日，佢透露同家人食飯，細佬請佢鋸扒，佢又指收到粉絲所送嘅禮物，其中有紅館模型，佢笑指頭痛緊點寄番去北京。陳曉東表示雖然已向紅館入紙申請，但現時已有一個大型場地已經為佢hold起檔期，佢話：「未簽，但我今次返香港已經傾緊舞台設計、流程。」年底可以舉行個唱？陳曉東話：「我唔急，但係我一個心願，我想有多啲時間去準備。」會唔會騷肌？佢笑住話：「我都唔差，但我唔覺得有8嚿腹肌先代表有誠意，我嘅造型師幫我度緊造型。」

問到兩個囡囡知唔知道爸爸係歌手？陳曉東提起兩個女就甜笑咁話：「0依家知道我係演員同歌手，佢哋會指住電視講『很帥』，真係冧晒，噚日個女彈鋼琴唱生日歌，我放咗上微博，甜到入心呀！」至於太太就負責教兩個囡囡畫畫，陳曉東表示一直都有將囡囡送嘅禮物收藏好。