政務司司長林鄭月娥早前上電台節目，被發現戴住「潮物」運動手環Fitbit Flex，似乎想知自己生活夠唔夠健康。消委會噚日咁啱出咗運動手環測試報告，總共試咗十二款產品，最高分嘅係Fitbit產品中賣四百九十八蚊嘅手環Zip，評分五粒星為滿分，有四星半，係測試入面最平兼最高分產品。至於林太用緊嗰隻Flex，售價八百九十八蚊，但係只獲四星，同其他九款產品同分。
報告仲點名話Flex響日常生活下量度步數唔係太準確，誤差超過25%，準確度表現完全唔及同牌子嘅Zip。睇嚟出名「好打得」嘅林鄭「鳩嗚」眼光卻麻麻，買唔中性價比最高嗰件貨。但消委會都話，運動手環功能、外形各有高下，最高分嗰隻Zip就冇檢查睡眠質素嘅功能，或者瞓個好覺先係林太心目中嘅重中之重。