韓國男團GOT7嘅香港成員Jackson（王嘉爾），今年以solo歌手身份出道，日前Jackson就回港單拖舉行粉絲見面會，同時接受本報專訪，大談對於創作音樂嘅想法，更提到自己嘅戀愛觀。

Jackson今年先後推出solo歌《Papillon》及《OKAY》，更一手包辦作曲填詞，不過Jackson一啲都唔覺得辛苦，反而認為拍攝MV嘅部分先係最困難：「自己創作歌曲時腦海入面已經有歌曲嘅主題，點樣將呢個主題變成個MV，點樣實現我腦海入面諗嘅嘢係最難，仲要搵一個識得我、了解我嘅MV導演先係最難，不過我已經搵到（理想嘅MV導演）。」

提到新歌《OKAY》MV有唔少騷肌場面，Jackson透露一開始係有更多騷肌鏡頭，不過佢嫌太多，覺得要適可而止而重新剪輯過。成日食外賣嘅Jackson於MV中大騷弗爆身材，佢表示自己冇特別keep fit，一直都係咁，話平時忙到冇時間運動，覺得排毒反而更重要，不過佢推出作品前一星期都會注意吓飲食。

Jackson視作品為「自己嘅仔女」，因而堅持一定要自己包辦整個製作過程：「（歌曲）係我創作出嚟，有我嘅靈魂，係會一世留喺個世界，我好珍惜呢樣嘢。」不過Jackson唔抗拒跟其他歌手合作，認為可以跟唔同人刷出火花，當中最想跟美國歌手Omarion合作。

Jackson承諾之後一定會推出廣東歌，雖然創作廣東歌係難，不過唔會阻止佢嘅決心，但Jackson非常口密，堅持唔透露幾時推出，話要畀大家一個驚喜。

密密創作嘅Jackson希望五年內可以舉行solo演唱會，如果有機會回港開騷，最想邀請林盛斌（Bob）擔任嘉賓：「我希望以後唔單止係演唱會上，有接觸、有互動嘅藝人係阿Bob。呢件事冇人知，只係得我爸爸知，我好細個時打過上電台，話我想做明星，當時就係佢（嘅節目），想同佢講返呢件事。」

跟父母感情要好嘅Jackson，創作時都會畀媽咪試聽自己嘅作品，仲大讚媽咪原來都好識音樂，給予非常有用嘅意見。不過Jackson於感情事上就好有主見，揀另一半時唔會理國籍：「愛係冇分啲咩，冇分年紀、冇分國籍、冇分size，咩都冇分，啱就啱。」又話媽咪阻止唔到佢啲咩，因為係自己嘅伴侶，其他人要尊重返佢嘅決定。日後拍拖、結婚時，Jackson承諾一定會向粉絲公開，但就一再強調自己依家忙到冇時間拍拖，連今年聖誕節及除夕都要工作。

提到演戲，Jackson表示都好有興趣，不過要等到自己好了解、準備好嘅時候先開始，又指自己偏好武打、警察嘅角色。最後Jackson希望明年可以多啲返香港：「有機會一定會返，我都想，橫掂都係喺呢度大，想（喺香港）多啲活動。」

髮型：Kim Jeung Eun
化妝：Jun Jiwon
服飾： Paik Jihoon
場地提供：香港嘉里酒店

更多韓流，喺晒《娛果》
http://fb.com/appledailyent