當年今日
關於我們

隔牆有耳:分析豬狼概念股 企啱邊 有錢贏 - 李八方

蘋果日報 2012/02/20 00:00


豬狼泥漿摔角打到成個特區政界七國咁亂,唔止影響政商界押注,連股市亦受波及。有財經界老友提點八方,嚟緊嗰幾星期要緊貼政情,事關選戰風雲同大市掛鈎,尤其係豬、狼系相關股份,少一陣都會走寶。
單睇上星期五、即係2月17日嘅股市走勢,八方都發現財經界老友所言有啲料到。舉個例吖,當唐英年同老婆喺上星期四合力上演卸責爛騷後,翌日股市全面反映唐豬勢危、狼人隨時冷手執個熱煎堆嘅景象,事關狼振英金主陳啟宗嘅恒隆系股份,全線爆升,恒隆地產升幅達3.652%,唔止跑贏升1.01%嘅恒指,喺地產股中亦好標青。羅康瑞嘅瑞安房地產亦升1.361%,絕對唔失禮。
反觀當日豬系股份就唔多掂,唐營競選辦副秘書長劉鳴煒所屬嘅華人置業原地踏步,跟唔上地產股升勢;競選辦主席寶Baby嘅東亞銀行仲逆市下跌,同唐英年選情一樣令投資者損手。
睇番過去幾個月,豬、狼系股價確實同選情掛鈎。舊年底市場傳出中央屠狼訊息後,恒隆系兩隻股份持續受壓,狼英民望攀升後先再拾級而上;到狼英爆出西九利益申報醜聞,恒隆系股價又相應受壓,真係好鬼應景。
財經老友溫馨提示:留意豬狼系股份異動,可能對特首選戰嘅後市有啟示。八方唔知今日開市後,唐系股份會唔會大插水,但勸投資者三思後動,事關睇錯大市企錯邊,後果好嚴重㗎。

mailto:[email protected]