當年今日

一味窩輪:新地Put輪候低買

蘋果日報 2002/08/07 00:00


花旗股市繼續散,杜指險守8千關,滙控(005)業績雖勝預期,港股一樣冇機會反彈,恒指上月低位9687一度跌穿,最低見過9632,好彩彈番上9700收市,冇咁肉酸。
美股連續3日大跌,有機會暫時喘定,但反彈過後,相信會再度尋底。港股亦係一樣,短線反彈隨時出現,但恒指唔易過萬點,超短線炒Call輪博反彈,乃超級高手所為,我輩普通炒友,都係等反彈過後再炒Put輪。
新地(016)低價推售馬灣樓盤,地產股即刻散晒,新地本身亦唔例外。睇番張圖,新地由1月至今形成大型雙頂,頸線在55元,股價昨收53元,已然跌破,估計短線後抽反彈後,掉頭下試47元嘅機會唔細,新地Put輪可以等調整買番啲。
新地Put輪並不便宜,較好嘅選擇係成交最多嘅9432,明年2月到期,溢價9.4%,槓桿率5.9倍,可以等溢價縮番多少至買。

9127啱搏殺格
另一件新地Put輪9127,只啱賭仔搏殺。隻輪本月28日屆滿,正牌末日輪,溢價1.6%,槓桿率11.3倍,未來幾日正股上落3%,佢會升跌3-4成。
章盛