新一輪自訂車牌拍賣名單又出爐，八方發覺今次自訂車牌登記號碼審核委員會相當手鬆，部份有踩界之嫌嘅車牌，都可以順利出街！例如一個寫法為「TOPLESS」嘅車牌，字面上可解作「無上裝」，八方喺網上搜尋器輸入「TOPLESS」，滿載露點相嘅鹹網即時湧現，估唔到咁都冇牴觸「相當可能令合理的人反感，或帶有品味低俗或不雅的含義」呢一項審批準則。

如果車牌容易令人誤會代表「中央人民政府在香港設立的任何機構」、「代表任何國家」或「任何國家的政府」等，委員會理論上都唔會批准。不過，今次有個「CCTV」車牌，寫法係中央電視台簡稱，難道審核委員會覺得央視唔算中央機構？另一個車牌「MACAU1」，難道加咗個「1」字就唔當係澳門政府？到時唔知賭王會唔會又投埋一份？
除咗幾個甚具爭議性嘅車牌外，八方發現今次自訂車牌可謂「猛人」雲集，除咗有國際時裝大師「VERSACE」外，又有歌星何韻詩「HOCC」，連日本嘅卡通人物小飛俠「ASTROBOY」都有，9月15日睇吓佢哋又會唔會現真身競投。