至於另一間標榜「全港首個線下網紅工作室」嘅公司仲開咗間cafe,提供地方同創作資源畀KOL,仲會設立「訓練學院」專攻KOL訓練課程。KOOLeader創辦人Kenny認為所有人都可以成為KOL,更睇好本地KOL市場發展,「因為連品牌商都未清楚點樣同KOL合作係最佳方法,所以我哋就設立呢個全開放式平台,希望品牌商好方便咁,喺我哋系統click幾個掣,就已經搵到相應嘅KOL。」線上係一個中介配對平台,線下係類似open office嘅資源分享平台。O to O(online to offline)線上線下包攬晒,好似好方便喎。佢仲話,客戶更可以將產品直接送到呢間cafe,KOL就直接嚟呢度攞產品試用,拍埋片、影埋相,就完成咗個job。咁方便,咪可以幫客戶快速生產like and share囉?
對於畢明嚟講,真正嘅KOL要質、量兼備,唔係臉書多幾個like就係,「我對美國一篇文章有好深刻印象,佢話其實Opinion Leader唔係淨係C to C(consumer to consumer)(消費者對消費者),應該係B to C(business to consumer)(企業對消費者),行業或者客戶都會聽你講嘢。任何方面嘅意見領袖都要得到受眾同所屬界別嘅尊重,即係respect呢件事。Respect係要賺返嚟,唔係like得多就會respect你。」佢認為想成為KOL就如成名一樣,係一個意外,「天時地利人和,同埋自己要不斷精進,要培養自己喺唔同方面嘅修養。」