韋英雄繼續勁,雷霆又贏一場!雷霆控衞韋斯卜克(Russell Westbrook)近排攞「三雙」真係停唔到手咁滯,周日主場對熱火就收穫個人今季第十次「三雙」,帶領球隊以93:75贏波,個西岸第八位越嚟越穩陣。
自從二月攞咗明星賽MVP之後,韋英雄真係上晒身,周日就喺近十三場入面第八次交出MVP級嘅「三雙」數據,為雷霆貢獻十二分、十七次助攻同十個籃板。原來今場已經係韋英雄個人今季第十次攞到「三雙」,係繼七季前嘅一代「三雙王」傑特(Jason Kidd)之後,第一個單季造出雙位數「三雙」嘅球員。不過,呢位全能控衞當然唔只進攻勁,防守都有一手。熱火後衞獲迪(Dwyane Wade)呢期都狀態大勇,但今場就俾韋英雄守到一戙都冇,只係入到十二分,係成個三月表現最差嘅一場。