曾經喺新地（016）同希慎（014）做過物業租務同管理嘅朱松溪，10月2號啱啱轉咗去南聯地產（1036）做高級租務總監，佢過檔之後第一個接手項目，就係集團喺觀塘全新發展嘅甲級寫字樓LandmarkEast，南聯高層仲落埋指令，出年年底前要項目出租率去到80%。

一上任即博炒？

不過家陣經濟咁差，好多公司都唔諗住擴充，寫字樓前景暗淡，所以朱松溪「直諫」話冇可能，最多都係租到七成喎。
嘩！咁嘅時勢，朱松溪竟然夠膽大大聲話一定做唔到老細嘅要求，唔通諗住博炒？佢解釋話𠵱家經濟環境唔好，好多公司對寫字樓需求都少咗，但係東九龍新寫字樓供應陸續有來，嚟緊會有成1200萬方呎樓面推出，供過於求，都幾難咁快租得出80%。所以佢哋𠵱家都諗晒計，出盡法寶去撈租客，包括將租金勁減近40%，去到十零蚊呎。唔知佢老細接唔接受佢嘅解釋呢？佢跟住乘機宣傳，話LandmarkEast係五星級質素寫字樓，但只係三星級價錢，抵到爛！