【李八方online】李偲嫣屈小學生模仿「曱甴裝扮」 校方發通告批指控失實
蘋果日報 2019/09/18 13:57
引渡惡法李八方ONLINE逃犯條例移交逃犯
正所謂「人一藍，腦便殘」，話說李偲傿喺「全香港市民支持嚴懲『本土暴徒』保護香港法治（公開群組）」貼咗幾張香港教育大學賽馬會小學學生戴住面罩、手持玩具槍嘅相就好似執到寶咁，一嘢屈落去話係某小學嘅「毒老屍」精心洗腦安排，畀小學生模仿「曱甴裝扮」。其實如果藍絲們肯每錯一次就種番一棵樹救下地球，你話幾咁好呢。
嗰間小學今日就發通告澄清，不點名批評偲傿嘅文字描述「失實」、「與事實不符」，其實活動早喺6月5號已經舉行咗，係學校「邀請當屆小六風紀服務生參與射擊活動」，可以提升學生嘅體能、自信及團隊合作精神，擴闊學習經歷，而相中嘅裝束係「訓練期間作保護之用，與最近本港的社會事件無關」，對相片引起部分人誤解深表遺憾。今次真係無辜辜躺着也中槍，有呢間學校嘅家長就同八方呻，話對校方唔發律師信又唔譴責李偲傿表示憤怒喎。
李偲嫣圖文並茂聲討班小學生手持「假武器」扮成射擊嘅樣。其實張相入面都見到大大個「NERF」字，fb專頁「求驗傳媒」本住求真精神向NERF確認，班小朋友係參加咗NERF嘅活動，而NERF其實只係畀小朋友玩嘅射擊遊戲，旨在畀小朋友體驗射擊活動，提升下體能、合作能力等。香港NERF槍迷會亦喺「求驗傳媒」專頁留言話，google下都知NERF係安全玩具，所以有面罩保護眼睛面孔，進行遊戲嗰陣一定要戴嘅，仲相當有智慧咁話「工具只是工具，不分善惡美醜」。
求驗傳媒fb圖片