雷曼苦主為討公道，作戰多時都未獲政府同銀行好好對待。眼見唔少長者喊苦喊忽咁凄凉，好多人都於心不忍，立法會金融界代表詹培忠話睇到一班苦主冇晒成副身家好慘情，決定攞100萬出嚟，幫苦主搵律師寫入稟狀告銀行，攞番一個公道。雖然一百粒對不嬲富貴嘅金勞詹嚟講濕濕碎，但對絕望嘅苦主嚟講，直情係海嘯巨浪之中嘅一隻小小救生艇呀！

攞100萬幫苦主追討

點解金勞詹肯抵得諗攞100萬出嚟？唔通好似做收買佬咁，畀錢將苦主手上嘅雷曼迷債，當爛銅爛鐵咁收買返嚟？查實金勞詹認定金管局包庇銀行，仲勁插總裁任志剛縱容銀行陷害投資者，唔少根本唔識投資嘅小市民，搞到血本無歸。佢本來提過條好橋，就係由政府同銀行劃一向65歲或以上嘅投資者賠足；65歲以下嘅就逐個傾。至於買雷曼嘅有限公司就唔使幫，事關佢肯定有顧問教路投資，諗過度過先至落叠，輸晒都唔應該𢱑賠償。
可惜政府同任總不嬲唔聽金勞詹支笛，幫苦主惟有諗其他方法。早前佢已經私下扲荷包，捐咗20萬畀雷曼苦主大聯盟搞活動，事關聯盟嘅成員已經損手爛腳，仲點會有錢同政府、銀行抗爭到底？

強調唔係為咗報仇

除此以外，金勞詹仲仗義疏財，決定攞大約100萬出嚟，幫有需要嘅雷曼苦主搵律師告銀行。以每個入稟狀計埋律師費要一萬蚊計，筆錢大大話話可以幫100個苦主，數目都唔少。金勞詹話啲銀行一見到苦主入稟法院，通常都會嗱嗱臨聯絡和解，唔理之後攞得返幾多血汗投資，至少為絕望嘅苦主帶嚟一線生機。金勞詹自爆早前都試過搵律師幫手咁做，但有啲律師竟然唔肯接，怕銀行小器搞報復，向佢哋callloan追債。
素來同金管局、證監會有牙齒印嘅金勞詹強調，唔係為報仇而幫苦主，只係覺得有需要喺唔公義嘅時候挺身而出。佢咁做嘅效果係點難以估計，但就肯定幫佢贏得一班雷曼苦主嘅民心同掌聲。俗語有云善有善報，聖誕節會去拉斯維加斯走一轉嘅金勞詹，話唔定隨時又贏一大筆返嚟再幫苦主喎。

mailto:[email protected]