上個月香港破咗一連16日酷熱天氣紀錄期間，有5個身穿行山服嘅大叔大嬸，喺西貢萬宜水庫行山，佢哋行到身水身汗，有個大嬸突然興之所至，無懼違法，跳落水塘暢泳，仲拍照放上facebook「開心share」；相片近日喺互聯網瘋傳，俾大批網民狂插「無公德心」、「污染食水」，相中游水大嬸俾網民「起底」，指佢係「香港大媽」。

手張開擺靚pose

瘋傳互聯網嘅一輯組圖有多張相，當中最惹火嘅一張大嬸成個身浸喺水中，只係露出個頭，佢仲刻意向天張開雙手擺個「靚甫士」影相留念。至於其他相片則喺水塘邊岸上拍攝，只見佢哋一行人着晒行山裝束，孭住背囊同戴太陽帽，相信事件係喺屢破酷熱紀錄嘅5月發生。
睇過組圖嘅網民都狠批事主「無公德心」、「污染食水」，有網民鬧爆：「大把沙灘你班XX唔死去游！」喺水塘游水嘅大嬸事後遭網民起底，指佢係一名香港人，事後佢可能知衰咗，請求網友刪post就功德無量，佢話：「我放自己fb相，點解要偷相公開！可否取消post！」但網友認為佢明知故犯罪加一等，拒絕放過佢，「大姐，萬宜水庫呀唔係你屋企個泳池，呃like都唔好犯法呀！」
根據《水務設施條例》第30(2)(a)條，任何人進入構成水務設施部份的水中或在其中浸洗或沖洗，即屬犯罪，一經循簡易程序定罪，可被罰款及監禁兩年。