爸爸從政，做仔嘅未必一定要跟嘅，好似今日開始招股嘅工程股安保（1627），行政總裁（CEO）葉亦楠（Rex）原來係行政會議成員葉國謙愛子，佢本身同財經界都有淵源，事關佢太太李恩盈（Catherine），係聯交所元老李福兆孫女。
Rex今年37歲，以上市公司管理層計落，算相當後生。噚日安保為招股上市開記者會，可能首次面對咁大班傳媒，Rex對稿讀都有少少緊張，問答環節就由執行董事游國輝傍實答問題，多數問題都係由比較老練嘅游國輝答晒。

浸大畢業　長島攻讀MBA

睇番招股書，Rex喺香港浸會大學讀完學士學位之後，去美國長島大學讀MBA，之後喺美國一間建築金屬及幕牆公司擔任總經理，又做過美國保險公司銷售及市場經理，到2008年回流香港。
葉國謙噚日冇現身做啦啦隊，華華打電話搵佢，佢透露同安保主席魏振雄識咗好多年，安保母公司係盈信（015），葉國謙亦做緊盈信獨立董事。原來Rex回流香港工作之初，魏Uncle已經問佢想唔想去公司幫手，直到舊年先成事。
Rex於2013年同任職律師嘅Catherine拉埋天窗，葉國謙話佢哋仲係過緊二人世界，未有小朋友。

李華華
mailto:[email protected]