5年前中國入世,5年後輪到越南,其實上月底世貿工作組完成最後一次會議後,已隨即宣布等11月7日嘅日內瓦會議確認,有睇新聞一定會知,甚至入定貨炒越南概念股如陸氏實業(366)。
嚟緊星期五,喺河內舉行APEC會議,到時美國總統布殊、國家領導人胡錦濤以及俄羅斯總統普京等世界級領導都會出席。其實唔使等到星期五正式開幕,因為噚日已經開始咗高官會議,嚟緊幾日仲有滙集全球跨國企業巨頭嘅商賈會議陸續開幕,要炒越南概念,係時候入定貨。
噚日市場焦點仲係中資金融股,H指由跌變升,好大程度係靠幾隻大型中資金融股力撐。人民幣續創新高係原因之一,但係中資地產股唔多升,似乎金融股升得另有原因。
5年前中國成功入世,過去5年亦都係國內銀行受保護嘅蜜月期,到今年12月,根據中國對WTO作出嘅承諾,中國對外資銀行所有限制將被取消。外資一時間未必可以全速湧入中國市場,但係較早前廣東發展銀行併購戰,最後由花旗勝出,係一個開始。