選美絕對係靚女們走入娛圈嘅好機會，能夠成為大台嘅選美三甲固然不愁演出機會，就算唔喺大台，好似上年選美真人騷就成功彈出咗鄧月平，電影片約都唔少。今年，耀榮娛樂就舉辦咗個選美真人騷《DIVA華麗之後》，其中5位參賽者日前接受專訪，大爆選美黑材料。

由耀榮文化舉辦嘅《DIVA華麗之後》，搵嚟《美選DnA》嘅製作班底，更喺香港、澳門同廣州招募32個素人靚女，每集都有唔同嘅挑戰，輸咗就會被分去「地獄組」，除咗無人照顧仲要同蛇蟲鼠蟻過一晚。

32F嘅Karen（哈比）、「嫩版顏卓靈」Nico、肥妹Ziggy、混血兒Ana同43吋長腿Maisie日前喺柴灣接受蘋果專訪，佢哋都話參選係因為想入娛樂圈。上圍最突出嘅哈比笑言以身型嚟講，絕對入唔到傳統選美嘅門檻：「不過身高亦係我嘅優點，因為一字排開嗰陣，鏡頭一定會凹入去搵我。平日我都有出嚟影相、做直播主持，今年我仲會出寫真集，我諗大家會對我有一定認識。」而最搶眼嘅肥妹Ziggy亦都話，肥係佢嘅缺點，不過同時都係優勢：「我身型比較出眾，今次參賽係想自己減肥，因為我唔想比其他女仔大隻。我已經減咗10磅架啦依家28.5吋腰，希望可以減到25吋，之後就做中女修身KOL。」

本身係游水教練嘅Nico就以「喊包」自居：「我好細膽，真係喊咗好多集，今次對我真係好大挑戰。同埋我真係好鍾意演戲，就算係臨時演員，我都有成日做。」

人多自然是非多，雖然每集《DIVA》都有啲「變態」考驗，不過佢哋就覺得「人」仲恐怖過啲挑戰，為咗搶鏡做好多嘢，不過佢哋都覺得呢樣嘢，同娛樂圈生存方式都幾似。

曾經患過抑鬱症嘅Ana話：「最難係人同人嘅相處，睇住啲人變，睇到邊啲人真心、邊啲人虛偽，真係做咁多年人都未見過啲人可以咁，為咗搶鏡，可以扮好朋友、扮拗交。」Maisie亦覺得人際關係最複雜：「因為好多女仔一齊，每日我都要調整自己心態。有啲人係雙面人，鏡頭前同鏡頭後好唔同。」佢仲愈講愈嬲話：「好似嗰日玩泥漿拔河咁，有個內地女仔為咗搶鏡，拉拉下突然放手，搞到哈比跌低，仲要入埋醫院，真係好心痛。」

反而受害人哈比就好似無咩激動，佢話：「當下冇諗咁多，淨係諗做乜山長水遠黎整親自己，但係嗰個女仔咁做我都明嘅。」佢仲話要完成比賽，都無辦法避開佢，只可以心裡面希望佢快啲去「地獄」。Maisie都認同哈比，佢仲話：「藝人嘛，為咗完成比賽同分數，都會合作。」

採訪：盧妹
攝影：陳俊強
拍片：廖達燊