由韓國女星申敏兒夥拍韓劇《Signal》男星李帝勳主演嘅tvN新劇《明天和你》，接檔孔劉、金高恩等主演嘅人氣韓劇《鬼怪》於噚晚首播，由於劇集係先拍後播，再加上接檔有好成績嘅《鬼怪》，申敏兒早前受訪時都表示壓力好大。

不過tvN電視台嘅作品一向都有口碑，所以噚晚播出《明天和你》嘅第一集平均都有3.9%收視率，最高收視率更達到4.6%，排收費電視台中嘅戲劇節目第一位。雖然首播收視不及《鬼怪》首播嘅6.9%收視率，但劇集口碑唔錯，獲唔少劇迷大讚申敏兒及李帝勳喺劇中好襯，更稱《明天和你》會成為兩位主演嘅人生作。