【I Love HK】喬寶寶孖印度同鄉派1萬個口罩：一條心真係冇分咩種族
蘋果日報 2020/02/08 18:59
派口罩排隊印度政府喬寶寶
- 喬寶寶專登改機票提早返港，與印度同鄉一齊派口罩。
- 有婆婆清晨7點已到場排隊
- 現場人頭湧湧
- 現場一度出現混亂
- 印度餐廳的員工都有幫手包裝口罩，每人派5個。
- 購入口罩的印度餐廳老闆 （戴眼鏡）日前已親自到垃圾站派口罩給清潔工人。（facebook圖片）
- 互相幫忙，不分種族。（facebook圖片）
政府在控制武漢肺炎疫情，施政慢半拍，反而民間好多有心人出心出力為香港，繼王維基親自到外地購買製作口罩機，蕭定一自設迷你廠房自製消毒手液，大劉劉鑾雄又購入2萬個口罩派基層人士。除了香港人救香港人，不同國籍人士都好有心，今日喬寶寶一班印度同鄉便在佐敦一間印度餐廳門外派發1萬個，合規格的3層外科手術口罩予65歲以上長者。
現場有超過2千人排隊，據悉最早一位婆婆更在清晨7點已到場排隊，大部份時間都好順利，只是截龍後，有攞不到籌人士鼓譟，引起一陣混亂。穿上「I Love HK」衫的喬寶寶說：「其實我哋噚晚先喺facebook貼出嚟，原本諗住有幾百人排隊，真係冇諗過咁多人。」
喬寶寶透露早前返印度出席太太弟弟的兒子婚宴，因為老闆要求幫手，所以特意將機票更改，他說：「香港疫情嚴峻，老闆好有心，佢同我講話想為香港做番啲嘢，但佢講廣話唔係咁好。佢同班員工之前都派過口罩畀前線清潔工，因為好多香港嘅前線清潔工其實都係南亞人士，例如尼泊爾、印度、巴基斯坦，又見好多藥房炒貴晒，長者成日要排長龍，所以想出一分力。」
他希望大家都可以有錢出錢，有力出力，他說：「我都係幫手，credit真係應該畀老闆，係佢專登喺印度訂咗批口罩嚟香港，但由於唔可以直送嚟香港、澳門同內地，只可以經沙地再返香港，其中一個貨櫃都遇到阻滯，所以數量少咗。」他透露餐廳員工都有幫手做包裝及分發，他說：「大家一條心，真係冇分咩種族，個個香港人都平平安安，始終新一年，長者都有個安心。」
喬寶寶亦有在個人Facebook留言：「I am just the volunteer! Under this heavenly sky we are one family ! Love is the only solution.(我只是一個志願者。在同一天空下我們都是一家人，愛是唯一解決問題的辦法)」。
-----------------------------