香港學生到英國讀中學,平均成績非常好,據《經濟學人》講,族裔之中,亞裔學生最厲害,女仔又遠遠拋離男仔(此點與香港相同)。但係近十年ALevel試卷愈來愈容易,英國僱主對高考成績冇信心,故此現在考慮Agrade之中又分四級喎!
香港人成日鬧本地學生英文唔掂,其實英語水準下降乃係世界現象,英國學生咪又一樣,英文、數學成績都水皮晒,倫敦城市大學嘅精算學幾出名,一年級新生要補修微積分(讀精算學必需)。啲教授咕咕聲,話新生點解考完高考都唔掂喎!
既然如此,英國對全世界人士嘅英文失去信心,內政部長DavidBlunkett堅持任何人歸化英籍的話,必須考英文試,澳洲、加拿大、新西蘭人也不例外,澳紐報紙為之嘩然,紛紛取笑BBC啲警匪片內嘅角色都唔知係講乜嘢方言,總之唔係英語,但亦都有紐西蘭學者話當地年輕人分唔清cheer,chair;beer,bear;ear,air之發音分別喎。