近年唔少藝人入股上市公司做主要股東，比較多人留意係趙薇大手投資阿里影業（1060）與中國創意（8368），其實謝霆鋒都好巴閉，將2003年一手創立、好似親生仔嘅後期製作公司「PO朝霆」先後賣畀漢傳媒（491）同數字王國（547），𠵱家佢持有兩間上市公司嘅股份㗎，不過後者嘅持股量只係好少。
謝霆鋒2014年底將PO朝霆60%股權注入漢傳媒，換來約16%股權，做咗主要股東，估唔到一年多些少，佢就將呢60%股權賣畀數字王國，自己私人再賣25%，佢私人賣呢批股份，換來數字王國0.81%股權，噚日市值約3,800萬元。
為隆重其事，謝霆鋒噚日專登出席數字王國搞嘅記者會，佢簡單以黑色領呔配閃令令皮褸，輕易成為全場焦點。

佢好盡責咁講咗10分鐘，介紹吓PO朝霆，大致係話佢有份參演嘅《12道鋒味》已開始使用PO朝霆嘅後期製作技術，第3輯《12道鋒味》預計喺農曆年後開拍，𠵱家電視電影以至廣告對後期製作需求增加，所以相當睇好呢門生意嘅前景云云，總之都係賣花讚花香。　
可惜佢前後大約逗留廿分鐘就匆匆走人，冇回答傳媒提問，所以大家都冇機會直接問佢，既然講到公司前景咁好，點解賣來賣去；又點解PO朝霆過去兩年越蝕越甘，舊年虧損2,444萬元㖭。
數字王國行政總裁謝安就希望，今次收購可以幫到公司打入大中華區市場，應該都係想借謝霆鋒嘅大名打響名堂喇。
橫掂搞開記者會，數字王國順便宣佈嚟緊同麥嘜、麥兜有合作，合照是常識吧。

李華華
mailto:[email protected]