韓國男團BIGBANG成員勝利上月控告前輩女歌手申恩成詐騙20.5億韓圜（約1,324萬港元），雖然事後二人和解，而勝利亦撤銷控告，不過就引起外界好奇勝利嘅收入到底有幾多。

早前，韓國某媒體進行調查，指出BIGBANG全體成員嘅收入大約係400億韓圜（約2.6億港元），當中隊長G-DRAGON（GD）一個人就佔咗150億韓圜（約9,600萬港元）左右，GD單係音源銷售、演唱會以及solo歌手等活動，收入大約有成6,400萬港元，而佢通過160多首歌曲嘅填詞、作曲等版權收入，每年大約有513萬港元，再加上擁有超過2,560萬港元嘅房地產，GD去年勁賺至少9,600萬港元。

至於勝利，原來佢透過個人投資都有唔少收入，個人資產大約36億韓圜（約2,300萬港元），佢嘅個人投資包括營運舞蹈學校，於首爾、光州、大田、木浦、仁川五個地方都有，而佢又於首爾嘅大學路開設咖啡室。

另外，太陽嘅收入大約係120億韓圜（約7,700萬港元），而T.O.P跟大成嘅收入雖然冇具體統計，不過二人透過電影、音樂劇等收入，最少每人有3,200萬港元。據知，YG跟BIGBANG嘅收入分配係3：7，廣告及其他活動就1：9，成員個人活動收入就全數歸個人所有，待遇算係好好。

另外，一向鬼馬嘅GD今日於Instagram公開新自拍扮動物，未免太可愛了吧？