國家質檢總局發現部份內地品牌紙包奶含有三聚氰胺後，好多香港人都聞奶色變，𠵱家連含有國產牛奶成份嘅食品，都唔敢隨便放入口，免得病從口入。港九拯溺員工會總幹事郭紹傑嘅太太，上個月返鄉下福州，見到伊利紙包奶平賣，唔執輸一次過掃咗兩箱抬返香港，畀兩個分別8歲同9歲嘅囝囝飲。
當時唔知國產奶可能有毒，兩個仔日日飲，飲剩10幾包，郭紹傑同八方呻，嘥錢唔緊要，最驚就係囝囝健康受影響。
佢一家人唔單止有飲伊利，同時係蒙牛擁躉，貪奶味香濃，點知原來「加足料」。兩公婆擔心到死，望住屋企飲剩半箱伊利，真係喊都冇謂。