韓國女星李寶英之前忙完劇集《悄悄話》就落實拍攝tvN新劇《媽媽》，於新劇中再次挑戰母親角色，據知新劇10月開拍，而李寶英就趁住呢段時間陪下演員老公池晟同就嚟兩歲嘅寶貝女智柔。

日前李寶英就孖住池晟及愛女出遊，池晟更將李寶英攬住囡囡嘅溫馨一面影低並上載到Instagram同粉絲分享，留言表示：「正在聞香草嘅母女。」好不幸福。而智柔將於下周二(13號)踏入兩歲生日，不過李寶英今日就要去工作，現身機場出發飛去巴黎為雜誌影新相，唔知趕唔趕得切返嚟同愛女慶祝呢？