【新增內容及圖川】
韓國樂隊CNBLUE嘅28歲隊長鄭容和，早前被爆涉享特權入慶熙大學，有指鄭容和或會被檢方起訴，而鄭容和今日正式入伍，下午到江原道華川15師團勝利新兵教育隊報道，之後以陸軍身份服役，約400名粉絲今日一早冒寒於場外等候oppa，而鄭容和預計明年12月4日退伍。

鄭容和噚晚於入伍前，分別於Twitter及微博公開平頭裝新照，又於微博用中文留言：「這段時間你們要好好保重自己的身體，等等我。先再見啦！」於Twitter就用韓文留言：「各位，我聽日入伍啦。希望大家都能身體健康，夢想及目標全部都能實現。我會好好的去，所以唔需要擔心，祝大家呢段期間都幸福！暫時再見啦！」

雖然有唔少粉絲喺訓練所門外守候，但到香港時間下午1時，即鄭容和報到嘅時間，現場傳媒及粉絲都唔見佢蹤影，其事務所就發聲明話：「大家好！這裏是FNC ENTERTAINMENT。於今日入伍的鄭容和已同其他入伍的士兵們一樣順利進入了訓練所。」

而鄭容和低調進入訓練所後，有網民影到鄭容和喺室內嘅情況，只見佢企得筆直，一臉專注咁望住前方，以及做出敬禮嘅動作。

更多韓流，喺晒《娛果》
http://fb.com/appledailyent