周日（5月3日）話就話跑11場，但其中兩場賽事出馬只係得五匹，其中頭場新馬1000米直路賽，過往時不時都有出馬偏少情況，但傳統大長途錦標賽2400米皇太后紀念盃，今屆居然都只係得五駒參加，確實罕見。

此場三級賽現時變成冷場，只由四匹摩廐馬圍攻一匹東廐「喜蓮騏星」。上屆盟主賀賢馬房「好好瑪」卻冇報名打衞冕戰，令人對此匹氣袋馬部署感到奇怪。

原來據賀賢所講，「好好瑪」最近發現肋骨有裂紋，現已停操接受治療，預計要休息四至六個星期，莫講話皇太后紀念盃，可能連五月底舉行的另一場2400米分級賽遮打盃亦要放棄。

上季曾取四Win的「好好瑪」，原本今季備受睇好可在一系列長途大賽有所作圍，可惜此駒季內表現未如預期，希望五歲馬仍值壯年，能盡快復元再戰江湖。