【蘭子把聲…】俾小朋友大喝「唔好嘈!」 陳淑蘭嬲爆:佢媽媽由得佢!
陳彥行陳淑蘭ViuTV晚吹魯傑
魯文傑同埋陳彥行,今日分別去柴灣為ViuTV節目《晚吹》錄影,其中魯文傑就同主持人陳淑蘭分享有關怪獸家長嘅問題,蘭子話自己雖然冇小朋友,但係身邊總係有啲朋友係屬於怪獸家長,佢話:「試過出去食飯,朋友嘅仔問我攞嘢食,但一句唔該都冇講,我就堅持佢一定要講,佢父母都喺度竟然冇出手阻止。又試過有一次坐朋友車,我細細聲講緊電話,佢小朋友大約六、七歲,竟然大聲喝我叫我唔好嘈,佢媽媽又係由得佢冇反應。」蘭子話事後同兩位朋友已經好少聯絡。
至於魯文傑自己又是否怪獸家長?佢話:「我個仔今年三歲半,九月讀K1,一路都冇刻意要佢讀學術性嘅班,想俾佢踢多啲波,小朋友都係鍾意跑跑跳跳。」佢話自己係演藝學院出身,都希望小朋友會以創意行先:「同太太有共識,希望佢中學之後就送去外國讀書。」咁小學呢? 佢話:「小學讀得唔好咪由佢囉,做人唔係淨係要讀書就代表全部。」
另外,陳彥行喺節目入面,就同蘭子傾寵物經,一向都係愛狗之人嘅行姐,屋企已經有五隻狗,不過等佢哋百年歸老前都唔會再收養其他動物。蘭子就講到愛犬早前因病離世:「狗狗好犀利,等到我返嚟香港,然後我就Call醫生嚟幫佢打針,我一直攬住佢等醫生嚟,本來約咗3點,但佢喺2點45分就喺我懷中離開咗,唔使俾我睇到佢打針嗰一幕。」蘭子仲話:「狗狗嘅火化儀式將喺聽日舉行,自己心情亦都平復咗好多。」