港股昨日走勢有些少陰陽怪氣，早市先低後高殺一輪淡倉後，午市借上海市委書記陳良宇被罷免消息急插，但跌近17500支持位即見反彈，跌幅收窄至54點，收17546。
其實與上海幫關係最密切的上海電氣（2727），開市已裂口下試2.46元，趙飛雲當時雖然唔知乜嘢事，但見上電跌穿2.50元的計數位，稍後在2.47元執行止蝕。中午爆出陳良宇下台消息，才恍然大悟上電早前為何有好消息唔升，反而外資大行沽盤不絕的反常情況。上電午市一度插至2.36元低位，其後近日力壓上電的瑞信由沽轉買，將股價掃回2.43元收市，但仍跌3.6%。
上電是否跌完，暫時好難講，不過見瑞信轉沽為買時，趙飛雲有些衝動想撈番，但最後忍手，決定忘記它。
另一隻近排差劣之作廣南（1203）見跌穿20日線1.36元，亦在1.34元沽出止蝕，睇嚟出過事的股票，大眾會有心理陰影，都係少掂為妙。

高寶業績明退實進

順誠（531）及升岡（485）昨跟隨大市回吐，但就未進入預定的收集區，加上大市氣氛平平，所以不急於買入。
高寶公布中期業績，半年賺7586萬元，倒退29.5%，表面上不好，實質明退實進，因為去年同期賺1.076億元，當中約有4400萬元為特殊收益，扣除此數，去年同期實賺6360萬元左右，今次中期實多賺約兩成。
趙飛雲