【新增圖片】

大冧巴馬今晚（20日）揚威谷中，特別係11號，之前已有「春盈」及「歡喜心」分勝第二、三場。到第六場三班2200米，再有11號馬「金如意」（蘇保羅馬房）首配史卓豐成功補中，來港後初次取勝，單Win閘前落飛都有64元派彩，組合獨贏A3派14元。

五歲新西蘭自購馬「金如意」上次初配潘頓，在四班谷草2200米負133頂磅，影相輸馬鼻位給「進綵」做二奶，今場初配史卓豐，跑高一班而途程谷草2200米不變，負磅則下調至116磅，結果留前鬥後，沿途守第六位，末段從大外欄一衝過晒，小勝頸位，就此打開在港出賽勝門。

蘇保羅表示「金如意」跑2200米最正宗，自從前仗加眼罩後跑來集中不少，上場負重磅影相輸少少屈居第二，輸點運氣，今場升班負輕磅有利，未來仍有數場谷草2200米賽程，會把握機會報名爭功。

今晚史卓豐停賽期滿復出，即憑「金如意」贏馬，不過他因早前另一宗犯規，被判周末（23日）起又要停賽兩期，史卓豐要復跑本地賽事，最快要到下月1日元旦沙田日馬，這晚谷戰遂成為佢個人2017年謝幕戰。

第六場俾落飛黨搬錢走，事關跑第二的「英明神駒」亦係落飛馬，連贏搭頭馬「金如意」着綠燈都有42倍，落飛黨在W、Q彩池合共獲利約1,800萬，可謂豬籠入水；三、四名分別為「安荃」及「勁哥兒」，四重彩派三萬四千幾。

三T正獎有人中，每注派872萬幾。