立法會今日繼續《議事規則》修訂大戰，民建聯「博士」葛珮帆會上聲稱收到通知，有人將用訪客身份進入大樓，「必要時衝擊會議廳」後，真係有一大班頭戴紅帽人士，排隊進入立法會，仲輪流被保安檢查隨身行李。

之不過大家咪誤會，呢班其實係立法會秘書處一早安排到訪立法會嘅小學生，今日應節地戴上紅色聖誔帽，逐一被保安用X光機搜查書包後，就進入立法會地面大堂表演唱聖誕歌。由於撞正立法會《議規》大戰，到場議員極少，最初除咗立法會主席梁君彥外，一名建制派議員都無，只有教育界葉建源同醫學界陳沛然同班小朋友合照。

到之後聽歌時，先見多啲建制派到場，包括田北辰同劉業強，民主派則有莫乃光、公民黨楊岳橋、白鴿黨林卓廷、黃碧雲同涂謹申現身，仲陪一班小朋友跳咗陣舞。期間被逐離會議廳嘅朱凱廸就喺佢哋上一層，喺聖誕歌聲中同大批保安員對峙。