【新增動新聞】
皇家馬德里喺星期二作客以3:1輕取多蒙特嘅歐聯分組賽，係葡萄牙球星基斯坦奴朗拿度（C朗）皇馬生涯第400場賽事，結果佢梅開二度，根據皇馬官網，隊史入球王C朗為球隊累積入波嘅總數改寫到412球。

32歲嘅C朗2009年以打破當時世界紀錄轉會費嘅9,400萬歐元由曼聯轉投皇馬，正式賽事「地標」係2009年8月29日以3:2擊敗拉科魯尼亞嘅比賽。C朗喺皇馬八年以來上陣第400場射入412球，平均每場射入1.03球，當中有42次演出帽子戲法，佢亦為球隊貢獻咗111次助攻，表現突出。

作為歐聯（包括前身歐冠盃）歷來入波最多球員，唔計外圍賽嘅話C朗依家累積射入咗109球，比第2位巴塞隆拿嘅美斯多13球，計埋外圍賽C朗就總共入咗110球，至於佢喺歐洲賽嘅入球總數就係112球。