44歲單親媽媽吳綺莉為人夫成龍誕女後，17年來獨力湊大囡囡卓林(新聞連結： http://bit.ly/2w4BClO )，怎料今年3月，吳綺莉涉刑事恐嚇女兒被捕，卓林又喺社交網稱壓力爆煲，吳綺莉則召開記者會，先指囡囡交友問題，令母女之間起衝突，爆喊哭求卓林返家(新聞連結： http://bit.ly/2wrAVXK )，兩個幾月後，卓林都返咗屋企住。

之前傳過卓林又搬咗出去，喺北角一個2百呎左右嘅劏房住，今日有周刊指卓林輟學(新聞連結： http://bit.ly/2hd74LY )，現時教小朋友普通話，同一個年約30歲嘅長髮外籍紋身女同居，呢個女仔係加拿大籍，成日喺網上貼自己啲片，喺網絡紅人，報道喺上周二影到佢哋一齊踢拖去買日用品，過馬路時拖晒手，二人又高舉個「屎揼」當劍，翌日夜晚就去咗銅鑼灣，一個餐兩份食，之後拖手行街，去搭扶手電梯時，外籍女更攬實卓林。

報道又指，呢位外籍女本來喺大埔教幼稚園，之後做咗卓林上門補習老師，並冇收學費，本來吳綺莉好緊張個女，不過近排已經開始學放手，又坦言好開通，最重要囡囡搵到個互相了解、心地善良嘅人，吳綺莉每個月都有俾啲錢囡囡作生活費，

睇番吳綺莉個微博，日前佢都貼咗一個作家寫嘅一段話，「我慢慢地、慢慢地瞭解到，所謂父母子女一場，只不過是意味著，你和他的緣分就是今生今世不斷地在目送他的背影漸行漸遠。你站在小路的這一端，看著他逐漸消失在小路轉彎的地方，而且，他用背影默默地告訴你，不用追」。

吳綺莉話從來唔會要求「你」按照邊個人嘅意志去活，只願「你」活成自己想要嘅樣子。未知吳綺莉口中嘅「你」，係唔係講緊囡囡卓林呢!?