中油潔能（260）食正晒環保國策，嚟緊日子，業績應該180度大翻身，有得諗。中潔05年易主兼主打壓縮天然氣（CNG）加氣站同相關業務，05、06年度（12月止）虧損上億銀計數。但中潔要為前朝，或者表現未理想業務狠勁撥備，影響到業績見紅。經過呢兩年狠撥，中潔再無後顧之憂。
又啱對上星期，發改委公布方案，預計3年之內，二氧化碳排放減少5億噸。呢期中央針對環保同溫室效應，積極強化能源政策措施，而中潔主打CNG，正正係環保能源，食正晒國策。再講，中潔經過兩年積極拓展，家陣已經喺祖國16個地區，由近至廣州，遠至新疆經營CNG業務，大有網絡優勢。以券商預測，中潔07年度可以虧轉盈，純利去到7400萬銀，到咗08年度，純利上1億銀，預期PE落到8倍。係咁意以中潔12倍PE做目標，中潔現價（0.69元）都要升近40%先到位。

榮盛穩陣到爆

榮盛科技（1166）5月20號做咗上邊主打，到家陣升得19%，仲未夠喉。呢期資金狂炒落後股，榮盛個仔華藝銅業（559），對上短短3個交易日，升咗1.15倍！博資金炒同氣連枝兼炒落後，榮盛已經有point炒一轉。再講，榮盛最新NAV1.98元，現價（1.03元）折讓講緊近48%，有咁大折讓墊底，穩陣到爆。繼續睇20號推介首站目標價1.29元，榮盛現價講緊要升25%，短打已經有魚有肉。