中國經濟、股市運滯大勢所趨，阿爺依家基本上係有招盡出。之前雙降，大市反應有限；再來多招養老金入市，大拿拿2萬億人仔，聽落好巴閉。不過對中、港股市嘅支持，只係得半日貨仔，噚日恒指都係倒跌186點收場。

假設美國對息口都係冇動作，咁相信個市都要吽一排，老土講句，依家真係炒股不炒市，績優股都可以炒吓，但你話啲經濟周期股份，好似銀行、工業、零售呢類就真係避吓。

股份推介方面，噚日隻中國動力（476）升得靚，收市漲8%報0.52元。其實公司業務拓展方面，都算係好積極。公司最新公佈，與香港生產力促進局合作研發的首部「香港品牌」電動巴士下月7日面世，預期最快明年首季可推出市場。另外，之前又成功獲河北邢台市政府100架電動巴士的訂單。

內地政府近年提高對公共巴士行業的環保要求，勢將掀起「換車潮」。中國動力就有同重慶國企兩江創投合作，咁政府單自然更易得手。公司之前就預料，今個財年會有600至1000架尺寸為6米以上的電動車訂單，成為集團全年收入的主要來源。

部分電動汽車概念股近期跑出，好似比亞迪（1211）、泰坦（2188）近期見升浪。中國動力氣勢轉強，相信係時候追落後。觀察吓啦，如果成功突破0.6元阻力，追入博上返5月高位0.8元。

掌握財經生活資訊，即Like「蘋果ATM」fb專頁啦！
http://fb.com/appledailyatm