葉家寶今日以創世電視總監身份，同魏秋樺喺旺角參與花車巡遊，公佈創世電視今晚8點正式登陸myTV SUPER 602台，家寶透露今晚將推出《感恩啟動慶典》，同香港市民一齊迎接2018年。

家寶又話，未來會有唔同類型嘅節目：「會邀請朋友、商界同政界嘅人物，做一個清淡節目。」邀請特首林鄭月娥做嘉賓？家寶表示：「希望可以請到啦，因為特首都係天主教徒，我哋好想特首可以將一啲好嘅訊息，透過我哋創世電視，向全香港嘅市民宣佈嘅。」溫馨提示，創世電視係基督教。

家寶續道：「因為我哋係傳播正能量，我哋亦都希望，係盡量係支持香港政府嘅工作。」喺剛過去嘅聖誕節，大陸有啲地方興起文革式嘅「批鬥聖誕老人」，同嚴禁慶祝聖誕，就算你話「支持政府」，又係咪真係可以當護身符呢？

至於劇集方面，家寶話正籌備尹天照同張文慈會拍攝網劇《逆天行者》，佢話：「呢套劇有《我和殭屍有個約會》嘅影子，但我哋唔係拍《我和殭屍有個約會》，因為尹天照講咗以後唔會演殭屍，所以喺劇裡面我哋會講好多神蹟奇事，全部都真實故事，計劃去柬埔寨同泰國取景，預計農曆新年前後開拍。」佢預計套劇有十三集，每集半小時，又謂希望可以同大陸啲網台合作製作。

真係得？

順帶一提，之前葉家寶四出撲水，目標係為創世電視籌4,300萬，一來係籌1,300萬元新址裝修費，另外籌3,000萬籌備拍絲路福音紀錄片。似乎依家露出曙光喇！

更多娛聞，喺晒《娛果》
http://fb.com/appledailyent

【minigame】2017瘋暈人物 返工打機唔使擇日
http://bit.ly/2CeWQkP