【超級大媽】激戰94分鐘! 54歲倪夏蓮反勝19歲日本小將
乒乓球倪夏蓮
【新增影片】
周五舉行嘅奧地利乒乓球公開賽,54歲嘅盧森堡老將倪夏蓮喺首輪對日本小將橋本穗花,先輸兩盤9:11同5:11下,連追兩盤11:6扳平。雖然呢位「超級大媽」再輸一盤5:11,但佢之後頂住壓力,連贏兩盤16:14同18:16,激戰1小時33分鐘42秒後,以盤數4:3反勝現時世界排名13位、19歲日本小將橋本穗花,而今場比賽亦刷新最長比賽時間!
倪夏蓮賽後受訪時,一直笑笑口咁大嗌:「好極了!」雖然倪夏蓮曾經係中國女乒嘅主力,而佢轉藉盧森堡後仍堅持打波,至今已四度征奧;不過,呢位盧森堡國寶級球手就話:「我都係唔夠經驗,但學習永遠唔會嫌遲。我會繼續學習喺比賽時畀多啲耐性,我仲有好多改善空間。」
倪夏蓮堅持打波,不禁令人聯想起原名岩室純子嘅DJ SUMIROCK,以82歲高齡成為全亞洲年紀最大嘅夜場DJ;佢本來係餃子店老闆娘,舖位於高田馬場,77歲開始到IDPS學藝立志做個專業DJ。兩人證明幾多歲可以有夢想,大媽同阿婆都可以出人頭地!