【李八方online】署長拉隊撩鼻喉表忠 張竹君𦧲深喉液化驗唔跟黨走
蘋果日報 2020/09/02 23:22
李八方陳漢儀張竹君全民檢測檢測大龍鳳
9月1日，強國「援港抗疫」嘅大龍鳳、全民「自願」檢測嘅第一日，香港省各政府部門同建制派傾盡全力做騷，拉大隊接受強國所推崇嘅鼻腔同咽喉拭子（棒撩）檢測，先有中大呼吸系統科講座教授許樹昌同港大醫學院院長梁卓偉兩位政府專家顧問「相濡以沫」、互相為對方採樣。市民做完之後仲獲贈一包八方都唔敢用嘅同心抗疫口罩，仲有成8千人，係8千人臨時walk in唔登記，包括一名內地女子牛小姐。
牛小姐話，貪免費唔使錢，做咗測試更安心，仲打算通關之後即刻返深圳求職。牛小姐可能覺得喺香港省做咗檢測（仲係免費）確保自己唔係隱性患者，唔會返國家播毒，貼心到呢……但可能佢少睇影帝張家輝個廣告囉，「你而家無……」
一大早，林鄭率領一班高官喺政府總部檢測中心做檢測。呢兩個身影，一眼就認到。改圖一流。 政府新聞處圖片
衞生署署長陳漢儀在場接受採集樣本作檢測。政府新聞處圖片
與社區檢測中心當值同事傾談，影吓相視察吓咁。政府新聞處圖片
衞生署牙科服務主任顧問醫生林德昭。政府新聞處圖片
講到做騷，衞生署署長陳漢儀醫生亦拉大隊，帶埋署方牙科服務主任顧問醫生林德昭、護士總監馮瑪莉去伊利沙伯體育館社區檢測中心，由當值同事為佢哋採集鼻腔同咽喉合併拭子樣本。咦，咁衞生防護中心傳染病處主任張竹君呢？
君君下晝同醫院管理局總行政經理庾慧玲出席疫情簡報會時，當然被追問有無參與全民檢測，君君話，因為要返office做嘢，所以一早預先採集深喉唾液樣本，唔使勞煩中心採樣人員喇；庾慧玲醫生就話早前有少少唔舒服嗰陣已經做咗檢測。君君仲引述朋友話，採樣流程好順，而且「冇乜人龍」添。
相信大家都記得，早喺上月初，內地來港嗰班「專家」批評香港用較簡易嘅深喉唾液檢測武肺係「太粗糙」，應該用較繁複、醫護須穿全套保護衣嘅鼻咽同咽喉拭子採樣。結果港府嗱嗱聲跟隨中國模式，仲欽點國企「幫緊你幫緊你」。
張竹君作為專業醫生，自覺有責任同大家講解，佢話社區主要用深喉唾液檢測，係因為較方便採集，醫護人員毋須特別喺負壓病房為病人取樣，而且好多研究亦發現，深喉唾液檢測同咽喉拭子檢測嘅敏感度及準確度一樣高，無奈話事人要跟黨走。君君呢個一早準備嘅深喉唾液樣本唔止唔跟陳漢儀大隊（指今日），而且可堪「解讀」。
君君下晝同醫院管理局總行政經理庾慧玲出席疫情簡報會時，當然被追問有無參與全民檢測，君君話，因為要返office做嘢，所以一早預先採集深喉樣本，唔使勞煩中心採樣人員喇；庾慧玲醫生就話她早前有少少唔舒服嗰陣已經接受檢測。本報記者攝
特首夜訪檢測中心 局長唔戴套兼多手
同場加映香港省市長鄭月娥女士晚上與公務員事務局局長聶德權、食衞局局長陳肇始去荔枝角公園體育館社區檢測中心「視察」，新聞稿話「並為工作人員打氣」。學君君啲朋友話齋，可能真係「冇乜人龍」，所以檢測中心人員得閒同鄭女士介紹番中心人手安排、場地設計、檢測流程，仲分享首日運作經驗。
話明「視察」，梗係用對眼啦，但聶局長似乎都幾手多，仲唔戴手套又唔着保護衣。當然同行嘅鄭女士同陳姑娘都冇戴啦。其實佢哋有冇諗過自己都可能係隱性患者，隨時播毒嘅呢？
同場加映香港省市長鄭月娥女士晚上與公務員事務局局長聶德權、食衞局局長陳肇始去荔枝角公園體育館社區檢測中心「視察」，但聶局長似乎都幾手多，仲唔戴手套又唔着保護衣。政府新聞處圖片
呢張送嘅！本報記者攝
-----------------------------
《蘋果》英文版免費試睇：了解更多
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨